Бюджеттік үдерістің тұрақтылығы бірінші орында тұруы тиіс - Премьер-Министр

кері қарай

«Барлығымыз бұқаралық ақпарат құралдары арқылы Грекияда не болып жатқанын көріп отырмыз. Грекия Еуропалық Одаққа мүше мемлекет, оның валютасы - еуро. Алдыңғы кезеңдердегі бірқатар проблемалардың, атап айтқанда бюджеттік үдерістің тұрақтылығына жеткілікті назар аударылмағандықтан, бюджеттік үдеріс тұрақты ма, жоқ па, соған қарамастан популистік шешімдер арқылы жақсы көрінгілері келгендіктен оларда қазіргідей үлкен проблема туындап отыр. Біз қазір дағларыстан шығып келеміз, Мемлекет басшысы белгілеп берген бағдарламаға сәйкес біз іргелі жылжудамыз. Сондықтан бюджеттік үдерістің тұрақтылығы бірінші орында тұруы тиіс», деді Премьер-Министр.

 Үкімет басшысы еліміздің қазынасының кірісі қаншалықты болса, шығыны да соншалықты болатынын, одан артық шығындала алмайтынымызды атап көрсетті.

 «Бұған әрбір министрлік пен ведомствоның нақты жұмысын дұрыс ұйымдастыра алғанда ғана қол жеткізе аламыз. Біз алдымызға  қойылған міндетті шешіп, келешек ұрпақтың қалтасына қол сұқпауға тиіспіз», деді К. Мәсімов.

 Осы орайда Премьер-Министр стратегиялық, экономикалық және бюджеттік жоспарлау жұмысын жақсылап жүргізу қажеттігін атап көрсетті.

 Премьер-Министрдің пікірінше, кей-кейде бұл жұмыстар керексіз, тіпті дағдарысқа қарсы бағдарламамен, оның аясында жүзеге асырылған іс-шаралармен салыстырғанда маңызды емес болып көрінуі ықтимал. Алайда, еліміздің бюджеттік үдерісінің тұрақтылығынан және орнықтылығынан база қалыптасады.